చంద్రబాబు, పవన్ కల్యాణ్, మోదీ మధ్యలో జగన్.. ఒక రియల్ స్టోరీ

ఎప్పుడూ కూడా ఎవరికి నచ్చిన విధంగా వారు రచన చేసుకోవడం, అనుకూలతను మరింత అనూకలంగా చూపించుకోవడం, ప్రతికూలతను మరింత ఎక్కువ ప్రతికూలతగా మలచడమన్నది సర్వసాధారణ విషయం. కానీ ఏపీలో మాత్రం పావలాను ముప్పావలాగా, ముప్పావలాను డబుల్ చేసి చూపిండంతో.. నిజమేదో, అబద్ధమేదో అర్థం కాక జనం తలలుపట్టుకుంటున్నారు. వైసీపీ ఎన్నికల్లో మరోసారి విజయం సాధించేందుకు ఒంటరిగా వెళ్తుంటే, టీడీపీ-బీజేపీ-జనసేన పార్టీలు కూటమి గట్టి,జగన్మోహన్ రెడ్డిని గద్దె దించేందుకు ప్రయత్నిస్తున్నాయి. ఈ నేపథ్యంలో ఏపీలో సభ తీరుతెన్నులపై ఎవరికి తోచిన కామెంట్స్ వారు రెయిజ్ చేస్తుంటే, అసలు కథ వివరిద్దామన్న ఉద్దేశంతో ఈ స్టోరీ అందిస్తున్నాం. ఒక్క ముక్కలో చెప్పాలంటే చంద్రబాబు డెస్పరేషన్, పవన్ కల్యాణ్ ఏమోషన్, మోదీ యాక్షన్ సీక్వెన్స్‌తోపాటుగా, ఎక్కడా కన్పించకుండా అంతా జగన్మోహన్ రెడ్డి ఇన్‌ఫ్లుయన్స్‌ను ఏంటో అందించే ప్రయత్నం. ఏపీ రాజకీయం రేపు ఎలా ఉండబోతుందన్నదాన్ని అర్థం చేసుకునేందుకు ఓ చిన్న ప్రయత్నం…

దశాబ్దం తర్వాత ప్రధాని నరేంద్ర మోదీ, ఆంధ్రప్రదేశ్ మాజీ ముఖ్యమంత్రి ఎన్. చంద్రబాబు నాయుడు, జనసేన పార్టీ అధినేత పవన్ కల్యాణ్ వేదికను పంచుకున్నారు. ఇది రాబోయే జాతీయ ప్రజాస్వామ్య కూటమి (ఎన్‌డిఎ) ప్రచారానికి నాంది పలికింది. ఆంధ్రప్రదేశ్ లో లోక్ సభ మరియు రాష్ట్ర అసెంబ్లీ ఎన్నికల నేపథ్యంలో ఈ దృశ్యం ఆవిష్కృతమైంది. భారత ఎన్నికల సంఘం శనివారం ప్రకటించిన షెడ్యూల్ ప్రకారం, మే 13న అసెంబ్లీ, లోక్ సభ ఎన్నికలకు ఓటేయనున్నారు. వారం రోజుల క్రితం తెలుగుదేశం పార్టీ మళ్లీ కూటమిలో చేరిన తర్వాత ఆంధ్రప్రదేశ్‌లో జరిగిన తొలి ఎన్‌డిఎ ర్యాలీకి ఆదివారం చిలకలూరిపేట సమీపంలో జరిగిన ప్రజా-గళం పేరుతో భారీ బహిరంగ సభ జరిగింది. పవన్ కళ్యాణ్ పిలుపు మేరకు గత కొన్ని నెలలుగా సాగిన చర్చల తర్వాత మిత్రులుగా మారిన శత్రువులు ఆరేళ్ల తర్వాత మళ్లీ ఒక్కటయ్యారు. స్కిల్ డెవలప్‌మెంట్ ప్రాజెక్ట్ స్కామ్‌లో మాజీ సీఎం చంద్రబాబుని AP CID అరెస్టు చేసిన తరువాత సెప్టెంబర్‌లో… టీడీపీ-జనసేన పొత్తును రాజమండ్రి సెంట్రల్ జైలు వేదికగా పవన్ కల్యాణ్ ధ్రువపరిచారు.

ఓవైపు చంద్రబాబు, మరోవైపు పవన్ కల్యాణ్ ఏపీ సర్కారుపైనా, సీఎం వైఎస్ జగన్ అవినీతి పాలన అంటూ విమర్శలు గుప్పిస్తే ప్రధాని నరేంద్రమోదీ మాత్రం, “వైసీపీ మంత్రులు అవినీతి రేసులో నిమగ్నమై ఉన్నారని” ఆరోపించారు. ఆంధ్రప్రదేశ్ ఓటర్లు ప్రస్తుత ప్రభుత్వాన్ని తొలగించాలని నిర్ణయించుకున్నారని పేర్కొన్నారు. ప్రధాని మోదీ, సీఎం జగన్‌ పేరును కేవలం ఒక్కసారి మాత్రమే ప్రస్తావించారు. అది కూడా వైఎస్ షర్మిల పేరు ప్రస్తావించినప్పుడు మాత్రమే.. “దయచేసి ఇక్కడ జగన్, కాంగ్రెస్‌లను వేర్వేరు పార్టీలుగా చూడొద్దు. వాటిని ఒకే కుటుంబానికి చెందిన వారు నిర్వహిస్తున్నారు. వారిద్దరూ కలిసి కూటమికి నష్టం కలిగించేలా శతృత్వం నటిస్తున్నారని… ప్రభుత్వ వ్యతిరేక ఓట్లు చీలి లబ్ధిపొందాలని చూస్తున్నారని.. ఇది కాంగ్రెస్‌కు ఓట్లు మళ్లించే ఎత్తుగడ” అని మోదీ విమర్శించారు. జనవరిలో ఆంధ్రప్రదేశ్ కాంగ్రెస్ పీసీసీ చీఫ్‌గా నియమితులైన షర్మిల, పోలవరం నిధులు, ప్రత్యేక హోదా, మూడు రాజధానుల పథకంతో సహా అనేక సమస్యలపై తన సోదరుడి జగన్మోహన్ రెడ్డిని బహిరంగంగా తీవ్రంగా దూషిస్తున్నారు. 2014 విభజన తర్వాత కాంగ్రెస్ నామమాత్రపు స్థితికి చేరుకున్న, హస్తం పార్టీని మోదీ విమర్శించడం ఆశ్చర్యాన్ని కలిగించింది. తెలుగు దిగ్గజాలు ఎన్‌టీఆర్, పీవీని కాంగ్రెస్ అవమానించిందంచటూ మోదీ అభియోగం మోపారు.

“తెరపై శ్రీరాముడు, కృష్ణుడి పాత్రలు పోషించి… టీడీపీ వ్యవస్థాపక అధ్యక్షుడిగా, ఆంధ్రప్రదేశ్ ముఖ్యమంత్రిగా పేదల కోసం పాటుపడిన ఎన్టీఆర్‌కి కాంగ్రెస్‌ వల్ల అవమానం ఎదురైంది. ఎన్టీఆర్ జయంతి స్మారకార్థం మేము ఒక నాణెం విడుదల చేసాం, ”అని మోదీ అన్నారు. “మేము పివికి భారతరత్న ఇచ్చాం. నరసింహారావుకు, కాంగ్రెస్ వాళ్లు ఎన్నో ఇబ్బందులకు గురిచేశారు. పార్టీలతో సంబంధం లేకుండా, ప్రజలకు ఇష్టమైన నాయకులకు ఎన్‌డిఎ గౌరవిస్తోంది. గడచిన ఐదేళ్లలో ఆంధ్రప్రదేశ్‌ అభివృద్ధి కుంటుపడిందని పేర్కొన్న మోదీ, “వికసిత్ భారత్‌-వికసిత్ ఆంధ్రప్రదేశ్‌” కోసం సాధ్యమైనంత గరిష్టంగా ఎన్‌డీఏ ఎంపీలు, ఎమ్మెల్యేలను ఎన్నుకోవాలని ఓటర్లకు విజ్ఞప్తి చేశారు. “చంద్రబాబు నాయుడు, పవన్‌ కల్యాణ్‌ ఏపీ ప్రగతి, ప్రజల హక్కుల కోసం పాటుపడుతున్నారని… డబుల్-ఇంజిన్ సర్కార్ ప్రభుత్వం ఇక్కడ వృద్ధికి మరింత వేగాన్ని అందిస్తుంది, ”అని మోదీ చెప్పారు. “నాలుగు వందలు దాటాలి; NDA కి ఓటు వేయాలి.” అంటూ మోదీ తెలుగులో వ్యాఖ్యానించి.. కార్యకర్తల్లో ఉత్సాహం తెచ్చేందుకు ప్రయత్నించారు. “మేము NDAలోని ప్రతి ఒక్కరినీ కలుపుకువెళ్తాం. అయితే కాంగ్రెస్ ఏకైక ఎజెండా దాని భాగస్వాములను ఉపయోగించుకోవడం, వదిలేయడం. ఇది ఇండియా కూటమికి వెన్నతో పెట్టిన విద్య. అందుకే బెంగాల్, పంజాబ్‌లో వాళ్లు కలవలేకపోతున్నారు, గొడవలుపడుతున్నారు” అని మోదీ దుయ్యబట్టారు.

ప్రజా గళం ర్యాలీలో ప్రధాని మోదీకి ముందు తన ప్రసంగంలో, కూటమిలో జూనియర్ భాగస్వామి అయిన పవన్ కళ్యాణ్ తనను తాను మహాభారతంలోని అర్జునుడితో పోల్చుకుని, “ద్వారకలోని శ్రీకృష్ణుడు పాంచజన్యం, శంఖం ఊదడం కోసమే” అని అన్నారు. “గుజరాత్ ద్వారక నుండి వచ్చిన మోదీ ధర్మం, న్యాయం, కూటమి విజయం కోసం ఈ ఎన్నికల కురుక్షేత్ర కోసం శంఖం ఊదుతారు” అని అన్నారు. పార్లమెంట్‌లో వివాదాస్పద బిల్లులు సహా పలు అంశాలపై మోదీ ప్రభుత్వానికి తిరుగులేని మద్దతు ఇచ్చిన జగన్మోహన్ రెడ్డికి టీడీపీతో బీజేపీ పునరుజ్జీవనం ఎదురుదెబ్బగా భావించినప్పటికీ, ఆంధ్రప్రదేశ్‌లోని రాజకీయ పరిశీలకులు ప్రధాని ప్రసంగాన్ని “ఆయన YSRCP అధినేత జగన్ పట్ల చూపుతున్న… చిరకాల వాత్సల్యానికి నిదర్శనం.” అని వ్యాఖ్యానిస్తున్నారు. “జగన్‌పై దాడిలో మోడీ చాలా వరకు నామమాత్రంగానే వ్యవహరించారు. గత ఐదేళ్లుగా అందించిన విలువైన మద్దతుకు, ఆంధ్రప్రదేశ్‌లో అందరికంటే జగన్ పట్ల ప్రధాని ఎక్కువ ఆప్యాయత చూపడానికి సరైన కారణం ఉంది” అని నిపుణులు చెబుతున్నారు.

ఆంధ్రప్రదేశ్‌లో రాజకీయ ఒత్తిళ్లతో టీడీపీ-బీజేపీ పొత్తు పుట్టిందని, చిలకలూరిపేట వేదికపై చంద్రబాబు ముఖంలో అశాంతి స్పష్టంగా కనిపిస్తోందని వారు చెప్తున్నారు. “చంద్రబాబు ఒక నమ్మశక్యం కాని భాగస్వామి, అని మోదీని తీవ్రవాద/మతోన్మాద వంటి పేర్లను కూడా పిలిచాడని… మోదీకి మరచిపోవడం, క్షమించడం తెలియదని చెబుతున్నారు. ఏపీలో ఇప్పుడున్న సీన్, మహాభారత ఎపిసోడ్‌తో సమానంగా ఉందంటున్నారు. యాదవ సేన కౌరవ పక్షాన పోరాడటానికి నియమించబడితే… కృష్ణుడే అర్జునుడికి సారథిగా, మార్గదర్శిగా మారాడు. గత వారం అద్దంకి, మేదరమెట్లలో YSRCP భారీ సిద్దం ర్యాలీలో – TDP అధికారికంగా NDAలో చేరిన తర్వాత – జగన్ రెడ్డి తనను తాను అర్జునుడితోనూ, రాష్ట్ర ప్రజలను కృష్ణుడితో పోల్చారు. ఎన్డీయే గెలిస్తే అది జగన్‌పై అధికార వ్యతిరేకత వల్లనే తప్ప టీడీపీ-బీజేపీ భాగస్వామ్యం వల్ల కాదన్న అభిప్రాయాన్ని నిపుణులు స్పష్టం చేస్తున్నారు. 2019 అసెంబ్లీ ఎన్నికల్లో వీరంతా విడివిడిగా పోటీ చేసినప్పుడు వైఎస్సార్‌సీపీకి 49.95 శాతం, టీడీపీకి 39.17 శాతం, జనసేనకి 6 శాతం ఓట్లు వచ్చాయి. బీజేపీకి ఒక శాతం కంటే తక్కువ ఓట్లు వచ్చాయి. అయితే, వేదికపై ఉన్న పెద్ద బ్యాక్‌గ్రౌండ్ బ్యానర్‌లో మోదీ, బిజెపి చీఫ్ జెపి నడ్డా చిత్రాలు ప్రముఖంగా హైలెట్ చేయగా… చంద్రబాబు, పురంధేశ్వరి పవన్ కళ్యాణ్‌ల చిత్రాలు ఒక మూలలో చిన్నగా కన్పించాయి.

ఇండియాను ఐదో అతిపెద్ద ఆర్థిక వ్యవస్థగా చేసిన ఘనత ప్రధాని మోదీదని… మాజీ ముఖ్యమంత్రి చంద్రబాబు ప్రశంసలు జల్లు కురిపించారు. భారతదేశాన్ని విశ్వగురువు, ప్రపంచ నాయకుడిగా మార్చే శక్తి అంటూ మోదీని ఆకాశానికెత్తారు. దేశాన్ని అభివృద్ధిపరచడంలో “మోదీకి తన ప్రతి ప్రయత్నంలో అండగా ఉంటాను” అని చంద్రబాబు ప్రకటించారు. “మే కెహనా చాహతా హు కీ దేశ్ కో సాహీ సమయ్ మే మోదీ జైసా సహీ నేతా మిలా హై. ఆప్కే హర్ కోశిష్ మే హమ్ ఆప్కే సాథ్ రహేంగే; యే హమారా వదా హై… ” దేశానికి సరైన సమయంలో మోదీలో సరైన నాయకుడు దొరికాడని నేను చెప్పాలనుకుంటున్నాను. ప్రతి ప్రయత్నంలో మేము మీకు అండగా ఉంటా. ఇది నా వాగ్దానం” అని చంద్రబాబు హామీ ఇచ్చారు. “మోదీ అంటే సంక్షేమం, అభివృద్ధి, ఆత్మగౌరవం మరియు ఆత్మవిశ్వాసం” అని చంద్రబాబు అన్నారు. చిలకలూరిపేట సమీపంలో జరిగిన బహిరంగ సభలో ఎవరు ఎన్ని లెక్కలు వేసుకున్నా జరిగిన అసలు చిత్రం ఇది.