వైకుంఠఏకాదశి రోజు ఏంచేయాలంటే?
సూర్యభగవానుడు ఉత్తరాయణానికి మారే మకరసంక్రాంతికి ముందుగా వచ్చే ధనుర్శాసంలోని శుక్లపక్షఏకాదశిని ముక్కోటి ఏకాదశి లేదా వైకుంఠఏకాదశిగా పరిగణిస్తారు. ఈ సంవత్సరం జనవరి 2 వతేదీనే ఈ పుణ్యదినం వచ్చింది. ఈ రోజు విష్ణువు యోగనిద్ర నుండి మేల్కొంటాడని అంటారు. ఈ దినాన విష్ణు భగవానుడు ముక్కోటి దేవతలతో కలిసి భూలోకానికి విచ్చేస్తాడని భక్తుల విశ్వాసం. ఈ శుభదినాన విష్ణు ఆలయాలలో ఉత్తర ద్వార దర్శనం ఏర్పాటు చేస్తారు. ఇలా ఉత్తర ద్వారం గుండా వెళ్లి స్వామివారిని దర్శించుకుంటే సకల పాపాలు తొలగిపోయి, స్వర్గం ప్రాప్తిస్తుందని అంటారు. ఈ రోజున ఉపవాసం ఉంటే అఖండ ఐశ్వర్యం లభిస్తుంది.
![](https://www.manasarkar.com/wp-content/uploads/2023/01/image-10-1024x538.png)
ఈ ఏకాదశికి ఏడాది మొత్తం వచ్చే 24 ఏకాదశుల కంటే అత్యంత విశిష్టత ఉంది.. వైకుంఠ ఏకాదశిలో వైకుంఠ, ఏకాదశి అనే పేర్లు ఉన్నాయి. ఏకాదశి తిథి విష్ణు మానస పుత్రిక అని నమ్మకం. ఈ ఏకాదశి నాడు అమృతం కూడా క్షీరసాగరం నుండి ఉద్భవించిందని పండితులు అంటారు. మహాభారత యుద్ధంలో శ్రీకృష్ణుడు అర్జనునికి ఈ రోజునే భగవద్గీతను ఉపదేశించాడని భక్తుల విశ్వాసం. తాను తిథులలో ఏకాదశి వంటి వాడినని శ్రీకృష్ణభగవానుడు చెప్పాడు. అందుకే ఈ రోజున విష్ణు సహస్రనామ పారాయణం, గీతాపారాయణం, గోవిందనామస్మరణం, పురాణ పఠనం వంటి కార్యాలు మోక్షప్రాప్తిని కలిగిస్తాయి.
![](https://www.manasarkar.com/wp-content/uploads/2023/01/image-11.png)
కలియుగ వైకుంఠమైన తిరుమల దివ్యక్షేత్రంలో ఈ రోజున శ్రీవారి గర్భాలయానికి ఆనుకొని ఉన్న వైకుంఠద్వారాన్ని తెరిచి భక్తులకు ముక్కోటి ప్రదక్షిణ మార్గంలో దర్శనం ఏర్పాటు చేస్తారు. తిరుమల తిరుపతి దేవస్థానం 10 రోజుల పాటు వైకుంఠద్వార దర్శనం అనుమతినిచ్చింది.
![](https://www.manasarkar.com/wp-content/uploads/2023/01/image-12.png)
మహద్వారం నుండి గర్భాలయం వరకు రకరకాల పూలతో అత్యంత సుందరంగా అలంకరించారు. 12 టన్నుల పూలతో ద్వారాలను, ధ్వజస్తంభాన్ని, ఆనందనిలయాన్ని అలంకరించారు. భక్తులు పరమ పవిత్రమైన ఈరోజున స్వామివారిని దర్శించుకోవడానికి పోటెత్తారు.